NOVI Homines

NOVI Homines

apud Iul. Capitolin. in Marco c. 7. Antonini mox ipse nomen recepit ---- et Verum eum appellavit ---- ob hanc coniunctionem pueros et puellas novorum hominum frumentariae perceptioni adscribi praeceperunt. Viro Erudito sunt Christiani, quos ad frumentationem ab Imperatore admissos fuisse, contendit, sed sine ratione; cum Marcum non solum alienum fuisse, ab iis, qui Christo dixissent sacramento; sed et exquisitissimis saepe suppliciis in eos saeviisse, constet. Casaubono sunt, qui recens ex lege Pii civitatem nacti, cives quidem erant, sed conditionis deterioris, quam alii ab antiquo cives Romani. Ita enim de illis Plinius Panegyr. c. 37. haec mansuetudo legis veteribus civibus servabatur: Novi, seu per Latium in civitatem, seu beneficiô Principis venissent, nisi simul cognationis iura impetrâssent, alienissimi habebantur, quibus

coniunctissimi fuerant. Verum aliud Novi Cives; aliud Novi Homines; quô nomine non alios, quam qui ex humili loco ad summa evecti, meritô suô vel Principum favore, natalibus suis nihil debent, appellari a Latinis Scriptoribus, moris est, ut diximus supra. Adde, quod sub Traiano, qui primus alimenta constituit eiusmodi puellis et pueris, istud novorum civium genus nondum fuerit. Itaque novorum nominum legi vult apud Capitolin. Salmas. Cum enim darent nomina sua, qui adscribendi erant huic frumentariae perceptioni, pueri hi puellaeque si quos Marcus et Verus ascribi praeceperunt, ideo novorum nominum dicuntur, quod praeter illos, quorum nomina iam habebantur adscripta, quosque iam instituerant priores Imperatores Traianus, et Pius, novi isti fuerint postmodum ascripti. Vide eum Not. ad loc.